ព័ត៌មាន

ពិធីសម្ពោធជាស៊េរី “កិច្ចសន្ទនាការនាំចេញ” ក្រោមប្រធានបទ "អនុលោមភាពតាមស្តង់ដារគុណភាពអន្តរជាតិដើម្បីការនាំចេញ"

(រាជធានីភ្នំពេញ)៖នាព្រឹកថ្ងៃសុក្រ ៩រោច ខែកត្តិក ឆ្នាំម្សាញ់ ព.ស. ២៥៦៩ ត្រូវនឹងថ្ងៃទី១៤ ខែវិច្ឆិកា ឆ្នាំ២០២៥ សភាពាណិជ្ជកម្មកម្ពុជា បានរៀបចំពិធីសម្ពោធជាស៊េរី “កិច្ចសន្ទនាការនាំចេញ” ក្រោមប្រធានបទ "អនុលោមភាពតាមស្តង់ដារគុណភាពអន្តរជាតិដើម្បីការនាំចេញ" ដែលមានការគាំទ្រដោយ សហភាពអឺរ៉ុប ប្រចាំកម្ពុជា និង ទីភ្នាក់ងារអាល្លឺម៉ង់សម្រាប់កិច្ចសហប្រតិបត្តិការអន្តរជាតិ (GIZ) ប្រចាំកម្ពុជា ក្រោមគម្រោង EU-German GATE។

ពិធីសម្ពោធកិច្ចសន្ទនាការនាំចេញនេះប្រព្រឹត្តទៅក្រោមអធិបតីភាព ឧកញ៉ា បណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា តំណាងដ៏ខ្ពង់ខ្ពស់ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា និង លោក Bryan FORNARI ប្រធានកិច្ចសហប្រតិបត្តិការសហភាពអឺរ៉ុប ប្រចាំកម្ពុជា ព្រមទាំងមានការអញ្ជើញចូលរួម ឯកឧត្តម ឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា, តំណាងសភាពាណិជ្ជកម្មខេត្តកំពង់ចាម, តំណាងសភាពាណិជ្ជកម្មមណ្ឌលខេត្តកំពង់ធំ-ព្រះវិហារ, តំណាងសភាពាណិជ្ជកម្មខេត្តបាត់ដំបង និង តំណាងសភាពាណិជ្ជកម្មមណ្ឌលខេត្តសៀមរាប-ឧត្តរមានជ័យ និង សមាជិក សមាជិកា សភាពាណិជ្ជកម្មកម្ពុជា ជាច្រើនរូប។

ជាមួយក្នុងនេះផងដែរ ក៏មានការ ចុះហត្ថលេខាលើលិខិតសហប្រតិបត្តិការ រវាងសភាពាណិជ្ជកម្មកម្ពុជា និង ទីភ្នាក់ងារអាល្លឺម៉ង់សម្រាប់កិច្ចសហប្រតិបត្តិការអន្តរជាតិ (GIZ) ប្រចាំកម្ពុជា។

គោលបំណងនៃការរៀបចំកិច្ចសន្ទនានៃការនាំចេញនេះ គឺ ផ្តល់ឱកាស និងអត្ថប្រយោជន៍ ដល់ ម្ចាស់ក្រុមហ៊ុន ម្ចាស់អាជីវកម្ម និងសមាជិក សមាជិកា សភាពាណិជ្ជកម្មកម្ពុជា ដែលមានបំណងស្វែងយល់អំពីការនាំចេញផលិតផលរបស់ខ្លួន ទៅកាន់ទីផ្សារអន្តរជាតិ។ ហើយក៏ជាឱកាស ទទួលនូវចំនេះដឹង អំពីដំណើរការនាំចេញ និងគន្លឹះជាក់ស្តែងដើម្បីជួយឱ្យអាជីវកម្មការនាំចេញ ប្រព្រឹត្តទៅបានត្រឹមត្រូវ ទាន់ពេលវេលា និងយល់ច្បាស់អំពីតម្រូវការនាំចេញនៅក្នុងទីផ្សារអន្តរជាតិ។ ជាពិសេស កិច្ចសន្ទនានេះ អនុញ្ញាតអោយ អ្នកចូលរួម បានទំនាក់ទំនងដោយផ្ទាល់ជាមួយនឹងវាគ្មិនដែលមានបទពិសោធន៍ការនាំចេញ ដើម្បីពិភាក្សាអំពីបញ្ហាប្រឈមដែលបានជួបប្រទះក្នុងការនាំចេញផលិតផលទៅកាន់ទីផ្សារអន្តរជាតិ។លើសពីនេះ អ្នកចូលរួម អាចផ្សារភ្ជាប់ទំនាក់ទំនងជាមួយអ្នកចូលរួមដ៏ទៃទៀត ដែលផ្តល់នូវលទ្ធភាពក្នុងការសហការគ្នា សម្រាប់ការនាំចេញផលិតផលរបស់ខ្លួននាពេលខាងមុខ។

សូមជម្រាបថានេះជាកិច្ចសន្ទនាការនាំចេញលើកទី១ ហើយ សភាពាណិជ្ជកម្មកម្ពុជា នឹងរៀបចំកិច្ចសន្ទនាការនាំចេញជាបន្តរបន្ទាប់ទៀត ក្នុងការជួយគាំទ្រ ដល់ សមាជិក សមាជិកា សភាពាណិជ្ជកម្មកម្ពុជា។

កិច្ចសន្ទនានេះបញ្ចប់ទៅដោយរលូន និងជោគជ័យដូចការរំពឹងទុក។