ព័ត៌មាន

វេទិការស្តីពី "ការវិនិយោគ និងការធ្វើពាណិជ្ជកម្មជាមួយសហរដ្ឋអាមេរិក"

Forum on investment and trade with the United States of America.

ភ្នំពេញ៖ នាព្រឹកថៃ្ងព្រហស្បតិ៍ ទី០២ ខែតុលា ឆ្នាំ២០២៥ នៅសាលាជាតិគយ, អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានគណៈកម្មការសម្របសម្រួលក្រុមការងារផ្នែកឯកជន សម្រាប់យន្តការវេទិការាជរដ្ឋាភិបាល-ផ្នែកឯកជន (គ.ស.ឯ.រ.ជ) បានដឹកនាំសមាជិកសមាជិកាសភាពាណិជ្ជកម្មកម្ពុជា, សហប្រធានក្រុមការងារផ្នែកឯកជនទាំង១៦ និងតំណាងក្រុមហ៊ុនសមាគម ជាតិ-អន្តរជាតិ ចូលរួមក្នុងវេទិកាស្ដីពី “ការវិនិយោគ និងការធ្វើពាណិជ្ជកម្មជាមួយសហរដ្ឋអាមេរិក”។ ក្រោមអធិបតីភាពដ៏ខ្ពង់ខ្ពស់ ឯកឧត្តម ស៊ុន ចាន់ថុល ឧបនាយករដ្ឋមន្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា។ កម្មវិធីនេះក៏មានការចូលរួមផងដែររបស់ ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា រួមទាំងការចូលរួមពីតំណាង ភាគីពាក់ព័ន្ធ ពីតំណាងក្រសួង-ស្ថាប័ន រដ្ឋាភិបាល សរុបប្រមាណជា ៣៤០រូប។

វេទិកានេះមានគោលបំណង៖

១. ផ្សព្វផ្សាយអំពីច្បាប់និងបទប្បញ្ញត្ដិជាធរមានដល់វិនិយោគិនក្នុងវិស័យឧស្សាហកម្មកែច្នៃនាំចេញទៅសហរដ្ឋអាម៉េរិក ដើម្បីចូលរួមចំណែកបង្ការនិងទប់ស្កាត់បទល្មើសបន្លំដើមកំណើតទំនិញទៅកាន់ទីផ្សារសហរដ្ឋអាម៉េរិក

២. ដើម្បីបង្ហាញពីកាលានុវត្តភាព និងនិន្នាការវិនិយោគនៅកម្ពុជា និងបង្ហាញអំពី “វិធានការដើមកំណើតនិងវិធានការបង្ការការបន្លំដើមកំណើតទំនិញ” និង “ការវិនិយោគ និងការធ្វើពាណិជ្ជកម្ម - តុល្យភាពរវាងការថែរក្សាទីផ្សារសហរដ្ឋអាមេរិកនិងការទាក់ទាញវិនិយោគ"

ក្នុងគោលបំណងធានាអោយបាននូវសមត្ថភាពនាំចេញមានស្ថិរភាព ការពារការងារ និងស្ដារឡើងវិញនូវទំនុកចិត្តរបស់ធុរជន និងវិនិយោគិននៅកម្ពុជា

៣. ដើម្បីឆ្លើយតបនឹងការព្រួយបារម្មណ៍របស់វិស័យឯកជន ចំពោះសមត្ថភាពប្រកួតប្រជែង ជាមួយអាត្រាពន្ធថ្មី របស់សហរដ្ឋអាមេរិក លើទំនិញនាំចេញពីកម្ពុជា និងហានិភ័យនានា ដល់វិស័យឧស្សាហកម្ម និងចង្វាក់ផលិតកម្មឧស្សាហកម្ម និង វិស័យផ្សេងៗមួយចំនួនទៀត ក្នុងទិសដៅសកម្មភាពនាំចេញទៅទីផ្សារសហរដ្ឋអាមេរិក។

ថ្លែងនៅក្នុងវេទិការដ៏មានសារៈសំខាន់នេះ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធាន គ.ស.ឯ.រ.ជ បានលើកឡើងថា វេទិការនេះបានឆ្លុះបញ្ចាំងពីការប្តេជ្ញាចិត្តរួមរវាងរាជរដ្ឋាភិបាលកម្ពុជា និងវិស័យឯកជនក្នុងការពង្រឹងកិច្ចសហប្រតិបត្តិការជំនួញ បង្កើនទំនាក់ទំនងពាណិជ្ជកម្ម និងពង្រីកឱកាសវិនិយោគជាមួយសហរដ្ឋអាមេរិក ដែលជាដៃគូសេដ្ឋកិច្ចសំខាន់មួយរបស់កម្ពុជា។

អ្នកឧកញ៉ាប្រធាន បានបន្ថែមថាក្នុងរយៈពេលជិតពីរទសវត្សរ៍ចុងក្រោយនេះ កម្ពុជាសម្រេចបានការរីកចម្រើនគួរឱ្យកត់សម្គាល់នូវកំណើនសេដ្ឋកិច្ច ការអភិវឌ្ឍន៍វិស័យឧស្សាហកម្ម និងការធ្វើពាណិជ្ជកម្មប្រកបដោយចីរភាព។ សហរដ្ឋអាមេរិកគឺជាទីផ្សារនាំចេញដ៏សំខាន់មួយសម្រាប់ផលិតផលកម្ពុជា ជាពិសេសគឺសម្លៀកបំពាក់ ស្បែកជើង ផលិតផលធ្វើដំណើរ ការកើនឡើងក្នុងវិស័យកសិកម្ម ការផលិត ឡូជីស្ទិក និងបច្ចេកវិទ្យា។

តាមរយៈវេទិកានេះ ក្រុមប្រឹក្សាអភិវឌ្ឍន៍កម្ពុជា, អគ្គនាយកដ្ឋានគយ និងរដ្ឋាករកម្ពុជា និងក្រសួងពាណិជ្ជកម្ម បានប្តេជ្ញាចិត្តរួមគ្នាក្នុងដោះស្រាយបញ្ហានិងសំណូមពររបស់វិនិយោគិន ដើម្បីបង្ការនិងទប់ស្កាត់បទល្មើសបន្លំដើមកំណើតទំនិញ រក្សាទីផ្សារសហរដ្ឋអាម៉េរិក និងទាក់ទាញការវិនិយោគ ប្រកបដោយការទទួលខុសត្រូវ តម្លាភាព និងអនុលោមភាព។

គួរបញ្ជាក់ថា វេទិការដ៏មានសារៈសំខាន់នេះ ក៏មានការធ្វើវេទិការរពិភាក្សា ដែលចូលរួមដោយតំណាងក្រសួងស្ថាប័នពាក់ព័ន្ធលើប្រធានបទសំខាន់ៗរួមមាន៖ ១. កាលានុវត្តភាព និងនិន្នាការវិនិយោគនៅកម្ពុជា, ២. ការធ្វើធុរកិច្ចជាមួយសហរដ្ឋអាមេរិកក្នុងបរិបទពន្ធគយបដិការ (ពន្ធគយ និងរបាំងមិនមែនពន្ធគយ), ៣. វិធានដើមកំណើត និងវិធានការបង្ការការក្លែងបន្លំដើមកំណើតទំនិញ, ៣. ការវិនិយោគ និងការធ្វើពាណិជ្ជកម្ម៖តុល្យភាពរវាងការថែរក្សាទីផ្សារសហរដ្ឋអាមេរិក និងការទាក់ទាញវិនិយោគិន និង ៤. ស្ថានភាព និងទិដ្ឋភាពទូទៅអំពីពាណិជ្ជកម្ម និងការវិនិយោគរបស់សហរដ្ឋអាមេរិកនៅកម្ពុជា។

វេទិការនេះបានបញ្ចប់នៅថ្ងៃ ខែ ឆ្នាំដដែល នៅវេលាម៉ោង ១៣:២០នាទីថ្ងៃត្រង់ ក្រោមបរិយាកាសយោគយល់គ្នា និងលទ្ធផលជាផ្លែផ្កា។

————

ព័ត៌មានបន្ថែម សូមទំនាក់ទំនងមកតាមរយៈ info.gpsfccc@gmail.com

#gpsfcambodia #pswg #gpswg #cambodiachamberofcommerce #សភាពាណិជ្ជកម្មកម្ពុជា #ccc